كيف تشعر انك فى رمضان ؟

السلام عليكم ورحمة الله وبركاته

احنا بجد عايزين نحس اننا فى رمضان بجد,,,,,,, يعنى أكيد هجرنا مشاهدة الافلام والمسلسلات والاغانى والفيديو كليب والالفاظ الغير مستحبة والخصام والبعد وغيره وغيره

لن أطيل موضوعي أو رسالتي عليكم وسأطرح عليكم نقاط وخطوات لتعرفوا من هو شهر رمضان ؟ ولتذوقوا حلته وتشعرون أيضا أنكم حقا في شهر رمضان

1- التوبة إلى الله عز وجل ومحاسبة النفس

2- الدوام والحرص على الصلوات الخمس في المساجد والاستمرار عليها بعد رمضان والإكثار من الأدعية والأذكار ولا تنسون الصدقات والتبرع لليتامى والمساكين في الشهر الفضيل

3- قراءة القرآن الكريم وختمه والبحث عن معاني الآيات واللجوء للتفاسير وحفظه

4- الحرص على صلاة التراويح وقيام الليل يا إخوان ويا أخوات أنا ملاحظ إن بعض الناس يعني بل أغلبيتهم وللأسف يتحججون بازدحامات الأسواق والمجمعات عشان يخلصون شغلهم حق العيد وفي بعضهم يصلون العشاء في مصلى المجمع نفسه ياخي صحيح أنه يجوز الصلاة بمصلى السوق لكن مو كل يوم انتوا جذي اتطوفون الاجر الاكبر خاصة البنات والنساء من أول يوم من رمضان لي آخر يوم عشان شنو اتركب لها بدلة العيد أو اتدور او اتخيط لها يا خوات السوق ما راح يصكر او يطير اذا صليتي التراويح والاسواق مشالله عندنا فاتحة بيبانها لي آخر الليل برمضان وصلاة القيام في ناس أنا معاهم الصراحة وفي ناس أنا ضدهم اللي معاهم هم اللي يقولون احنا ما نقدر انصلي القيام كل يوم عشان ما يتأخرون على دواماتهم وبنفس الوقت يطالبون بعطلة العشر الأواخر عشان يتفرغون تفرغ كامل لصلاة القيام وفي بعضهم ياخذون اجازة من دوامهم للعشر الاواخر وهذا شي مشالله يفرح ويشجع على تطبيق عطلة العشر الاواخر واللي انا ضدهم الناس اللي يسهرون بالقهاوي وغيره وعالمسلسلات واتطق براسه على يوم ان يصلي بالمسجد اللي راح يصلي فيه الشيخ مشاري العفاسي عشان شنو يتأخر على دوامه أو انه ما يداوم ويطقها نومه بنهار اليوم الثاني كله واهوه يدري ان الشيخ العفاسي يتأخر جزاه الله خير بصلاة القيام واهوه اصلا متعمد رايح بس لانه معجب بالعفاسي هذا اذا يعرف منو الشيخ مشاري العفاسي بس يسمع عنه بين الناس يعني رايح مو نيته نية صلاة وأعتقد ان شيوخ الدين والشريعة برمضان اللي طاف تكلموا عن هالنقطة واذا بتكلم عنها ما راح اخلص لان يبيلها موضوع جديد

5- الحرص على حضور الندوات والمحاضرات والدروس الدينية أبسط مثال بعد صلاة العصر في كل مسجد وخطبة صلاة الجمعة غنية عن التعريف فهي خير مدرسة

6- الذهاب للعمرة في شهر رمضان يا سلام يا اخوان ويا خوات العمرة برمضان لها طعم خاصة بالعشر الاواخر انتوا بنفسكم راح اتحسون ان اجسامكم تغتسل من الذنوب يا سبحان الله ترى ما هي خسارة لو اتخصص لك مبلغ حق تذكرة سفر او للنقل الجماعي مع السكن ومصروف لك اقل شي ثلاثة ايام عمرة وعمرة مقبولة انشالله

7- الاسراع بالتسجيل بحلقات تحفيظ القرآن والاشتراك بالمسابقات الدينية أبسط شي التسجيل بجمعية أحياء التراث الإسلامي أو مصابيح الهدى

8- أختي المسلمة اجعلي غرة رمضان هو يومك الاول بارتداء الحجاب والالتزام به اولا طاعة لله تعالى ثانيا الحجاب صيانة لعفة المرأة ثالثا ذكرى حلوه يعني انشالله اذا تزوجتي وصار عندج بنات توصينهم عالحجاب تقولين لهم الله اتذكر اول يوم لبست فيه الحجاب اهوه اول يوم رمضان ذكرى حلوة ومنها تشجيع منج حق بنات جيلج

9- الحرص على صلة الرحم والزيارات بين الاهل والاصدقاء وعندنا عادات حلوه ومنها الغبقة ليش نسيتوها حددوا لكم يوم بالاسبوع او يومين تجتمعون فيه وكل بيت يسوي له أكلة معينة او طبق حلو ومشالله على أمهاتنا الكبار وخواتنا اللي يساعدونهم ينوعون لنا برمضان بهالاكلات وهالحلو اللي لما يخلص رمضان وتروح تزور اهلك بالعيد تلقى واحد فيهم يقولك مشالله يا فلان متنان والمشكلة اللي يقولك عليه كرش جنه وحدة دشت شهرها هههههههههه يعني حامل بالشهر التاسع عموما بالعافيه عليكم مقدما

10- يا جماعه بما اني قلت للبنت خلي غرة رمضان هو اول يوم لج تلبسين في الحجاب كذلك اقولها للمدخنين والمدخنات اجعلوا غرة رمضان هو اليوم الاول في اقلاعكم عن التدخين مع الاستمرار ما بعد رمضان وبما انك استطعت ان تقلع عنها نهارا فلديك الشجاعة ان تقلع عنها ليلا والاقلاع عن التدخين بجميع انواعه من سجاير وشيشه والله يعطيكم الصحة والعافية ويشافيكم يارب

11- عدم الاستماع إلى الأغاني وتبديلها بالأدعية والقرآن والأذكار وبعدين في بعض الشباب تلقاه بنهار رمضان ما يسمع اغاني بس يأذن المغرب من ياكل التمره على طول راح البقالة شرا له زقاير وينزل جامات السيارة ويطول على الاغنية حدها ويدخن لييييييش اتخرب صيامك ؟؟ لي هالدرجة رمضان مو معطيك حريتك لكن على قولة القايل مسلم بعد التمرة يدعي ربه ومنافق بعد التمرة يقلبها ليله حمره الله يهدي الجميع قولوا آمين

12- يا جماعة الاسواق والمجمعات برمضان زحمة وهذا الشي معروف ومن الواقع عشان يخلصون شغلهم ويستقبلون فرحة المسلمين واهيه فرحة العيد فاا أتمنى من الشباب يغضون البصر وما يضايقون البنات والبنات أتمنى انهم يحتشمون باللبس ومكياج ما مكياج اتمنى هالشي ما يبالغون فيه او ما يحطونه يا شباب ويا بنات هالشي احترام لشهر رمضان واحترام لديننا واسلامنا وعاداتنا وتقاليدنا عشان نحافظ عليها ما نخليها تموت والله يحفظكم

13- عدم الادمان والانشغال بأحداث المسلسلات الخليجية والعربية اللي مالها هدف وين يقولون تتكلم عن قضايا المجتمع الخليجي الا خربوا سمعة المجتمع الخليجي يعني مسلسلات رمضان عقب فوازير وتيمورلنك وجحا ومدينة الرياح وعلقم مالها معنى ويحجزون لهم اوقات عشان يعرضون مسلسلاتهم وللأسف برمضان البرامج الدينيه يمكن ما يتعدون 3 برامج باليوم للأسف والله عيب وبالعشر الاواخر الجرايد يسوون مسابقة منو احسن فنانه ومنو احسن يطق طراق يعني عيب العشر الاواخر اتلهون المسلمين بأسئلة مالها هدف ومالها سالفة سخيفه ومتخلفة بصراحة احلى مسلسل للحين ينعرض برمضان طاش ما طاش وغير هالمسلسل لا تشوف حتى المسلسلات التاريخية قاموا يخورونها رقص ولبس استغفرالله شقول يعني غجريات وبرمضان الله الهادي

14- إحياء العادات والتقاليد والتراث الرمضاني القديم القرقيعان والغطاوي والقصص الحلوة ترى كثر ما نحافظ على هالعادات الحلوة يصير رمضان أحلى وأحلى واتمنى من اخوانا العرب وخاصة في مصر عندهم عادة حلوة واهيه شراء فانوس رمضان ويطلعون عيالهم الصغار بالشارع ويجتمعون مع بعض وكل واحد ماسك بيده فانوس رمضان عادة حلوة وعسى الله لا يغير عليهم وعلينا

ملاحظة

في بعض النقاط اللي ذكرتها اتمنى انكم اتطبقونها قبل رمضان وقصدي واضح

وصدقوني هالكلام اللي قلته لكم من كل قلبي واتمنى الكل يطبقه لأن تتردد مقولة على ألسنة الناس وهي مانحس إن الحين شهر رمضان او ما جنه رمضان تدرون ليه؟ من البلاوي اللي تطلع برمضان وعلى قولة المثل كل ممنوع مرغوب

وآسف عالاطالة وسامحوني اذا في كلامي شي غلط أو يجرح

وكل عام وأنتم بخير ومبارك عليكم الشهر وتقبل الله طاعتكم
منقول

يارب يهدينا ويبعد عنا القنوات الفضائيه

شكرا على الموضوع يا جميل

» حصريا:- ۞ نغمات شهر رمضان ۞ ^^رمضان كريم ^^كل عام وأنتم بخير.
» فوازير رمضان حل الفزوره
» افضل ساعتين فى رمضان
» رسايل sms رمضان كريم